fbpx
Loading

مصطلحات عامية “خرمت” حدود إدراك الأجيال!

بواسطة: | 2017-11-03T21:20:55+02:00 الجمعة - 3 نوفمبر 2017 - 10:30 م|الأوسمة: , , , , , |
تغيير حجم الخط ع ع ع

العدسة – مؤيد كنعان

ياجدعان.. يااخوانا..  امتى بقى هنبطل المصطلحات الغامضة اللي بنقولها كل يوم دي؟!.. واللي هي ملهاش أي نظير في القواميس أو المعاجم ومتسابة كده ملهاش أهل يسألوا عليها.

مصطلحات لا علاقة لها بالمنطق ولا بالفلسفة حتى.. بتتقال كده لا شعوريا لكن عمرها ما عدت ع الفص الشعوري بتاع المخ عشان لو وقف قصادها هيهنج.

هذا المقال الرصدي محاولة للتساؤل عن المكنون المنظور والخفي الكامن وراء تلك التعبيرات.. وحجرا ألقى به في المياه الراكدة عشان يعمل دواير ونقعد نلعب وبتاع.. واستلهام للمنظور الحضاري المصري الكامن في مفهوم اللاوعي الإدراكي.

نبدأ كده مع بعض التعبيرات الفشيخة..

1- ربنا يولي من يصلح: مقولة سياسية مميزة وخالدة للمصريين، ظاهرها الإيمان، وباطنها حتة جبنة في الدكان، بتتقال لما يكون المصري من دول عاوز يقفل الكلام عن الرئيس والسلطة والنظام، وساعات بيتم استدعاءها لما بيكون الكلام بين موظفين عن رئيس الشركة، أو حتى الصبيان عن صاحب الورشة.

الرطنة بتاعة الكلمة (الأكسنت) بتختلف، لكن بنسبة 90% كله بينطقها بفتح الياء وضم اللام، لكن في قلة من المثقفين في قهاوي البورصة بينطقوها بضم الميم وكسر اللام، وأهو كله هري ياعم الحاج.. ليه بقى، لأن معشر المؤمنين دول متأكدين مليون في المية إن ربنا مش بيولي من يصلح إلا لما يكون الناس صالحين ومستعدين يساعدوا “من يصلح”.

2- عاجز عن الشكر: عاجز ليه يعني لسانك مقطوع مثلا ولا كلمة شكرا بقت عايزة موافقة اتنين أمناء شرطة من قسم الدرب الاحمر؟!

3- خلي بقى: ياعم خلي ازاي وانت قفشت مني الفلوس وفي ايدك بالفعل.. يعني لو قلتلك ماشي وشديت الفلوس من ايدك ومشيت مش هتجري ورايا وحرامي وبتاع وتلم عليا الناس ولو قريبين من قسم الدقي ممكن البس قضية تنظيم ارهابي مبيحاسبش على علب الكانز.

كان على عيني: إيه بقى اللي كان على عينك دبانة وهشيتها مثلا ولا طالعلك دمل على الجفن وخف لوحده. معاكش قول معييش أو مش قادر اديك ((بس هتلبس قضية إساءة للرئيس)).

4- لقمة هنية تكفي 100: ياحاج 100 مين ده هو طبق فول تمناية ورغيفين يعني تكفيك لوحدك بالعافية.. هي ممكن تكفي 1000 مش 100 بس بالنظر بس.. بس عموما هي كلمة حلوة يؤخذ بها في فضائل الأعمال.

5- احنا بنشتري راجل: راجل بحاله.. ياعم انت عارف دلوقتي الكلية بتتباع بكام في السوق ولا الدراع ولا الفخدة.. الا بقى اذا كنت سيادتك رئيس مجلس ادارة مافيا تجارة الاعضاء.. بس هو عموما اللي بيتم في الراجل المذكور بعد الجملة دي أكتر من تجارة الأعضاء.. ده شيء لا يتحمله بشر ولا بني آدمين.

6- ده احنا نجهزهاله ونجيبهاله لحد البيت: انت كداب يابوصلاح لأنك بتجهزهاله بس بتطلع على جتته كل جنيه دفعته ع البت ومبتوديهالوش ع البيت.. هو اللي بييجي ياخدها وبيدفع حق عربية الزفة والكوافير والقاعة كمان!!

7- نجيلك على عنينا: واما تجيله على عنيك هتعمل امتى مقاس النضارة لرجلك؟!

8- متقطعش الجوابات: اكسبريشن تمانيناتي.. في دلوقتي حاجة اسمها خلي بالك من شحن السمارت فون.. متقطعش باقة النت عشان بتوحشني.. اوعى تعمل Unistall للفايبر..

9- صح النوم: طب متصحيني انا ياعم، النوم ذنبه إيه تكدره معايا؟! لما بتصحيه بيقرفني انا طول النهار.

10- دايما: دايما ايه بقى؟.. دايما ياعم انا كلت الحمد لله.. ايوه ياسيدي بالهنا والشفا بس دايما ايه مش فاهم بردو.. دايما دموع مثلا ولا دايما على بالي.. انت عاوز تغني؟!

11- تعدمني: انت ليه مفترض – بادئ ذي بدء – إن لما تدعي على نفسك قدام أي حد بيكلمك إنه هيصدقك؟! لما تحب تخلع من خدمة ليه أو حوار معاه، يعني على أساس إنك بالنسبة له أغلى حاجة في الوجود؟ معادش ياعنيا!! الكلام ده إحنا في وقت اللي حد فيه بيتعدم التاني بيقول استريح.

12- إحنا زارنا النبي: المرادف الفلكلوري المتدين لمقولة “ليك شوقة ياغالي”، بس ده كان زمان، لأنها دلوقتي بقت تتقال من تحت الضرس، بينما الضرس التاني تحته بيقول: “إنت ايه اللي جابك الوقت ده احنا هنحط الأكل ويادوب الفرخة أم 50 جنيه هتقضيني انا والعيال وامهم”.


اترك تعليق